Ibilbide honek Arabako Errioxako paisaia ederra erakustea du xede: hasi Toloñoko Mendilerrotik eta Ebro ibairaino, erriberako landaretzadun bailarak zedarritzen dituzten errekak eta uharrak, zereal-soroak, baso autoktonoak, olibadiak, mahastiak eta fruitu-arbolak ingurune ederrekin uztartzen dira. Paisaia hori oso aberatsa da arkitektura tradizionalaren eta ondare historiko eta arkitektonikoaren aldetik ere (trikuharriak, harrizko etxola tipikoak, zubiak, iturriak, ikuztegiak, eskortak, teileriak, ubideak, bide historikoak, beloritak edo pikotak, errotak…), gizakiaren eta ingurumenaren arteko harreman oparoaren erakusgarri.