Uribarri-Ganboa urtegiaren perimetroa inguratuz, ibilbide honek Mendixur ornitologia parkera eta Landa eta Garaio Eskualde Parkeetan dauden Araba barreneko hondartzetara hurbilduko gaitu, bata eta bestea aisia eta atsedenerako leku paregabeak. 

0 km

Garaioko Eskualde Parkean dagoen informazio etxearen ondotik abiatuko gara. Hau ezkerretara utziz errepidean aurrera egingo dugu, harik eta urtegiaren gainetik doan pasabidearen desbiderapena hartu arte. Ezkerretara, urtegiaren adarretako batean kokaturik, Mendixur Ornitologia Parkea ikusi dezakegu. Hau Ramsar hitzarmenak babestutako hezeguneen artean dago, migrazioan doazen ur-hegazti askorentzako atsedenleku eta bazkaleku garrantzitsua baita. Urtegiko dikea zeharkatu ostean, GR 38tik–Ardoaren eta Arrainaren bidetik- gertu joango gara. Urtegia inguratuz Azuako herrigunerantz abiatuko gara. Bertako elizako aurriek urtegiko pasabide berri batera hurbiltzen ari garela adierazten digute, oraingoan albo batera utziko duguna.

13,4 km

Laster helduko gara Langara-Ganboako herrigunera. Hau zeharkatu eta aldapa gogor baten ostean urtegiko presara hurbilduko gara, Zadorra ibaia berriki eraikitako pasabidetik zeharkatuz. Errepidetik jarraituko dugu oraingoan, pixkanaka gero eta gertuago ikusten dugun Uribarri-Ganboako herrigunera hurbilduz. Herrigunea zeharkatu ostean bidegorria hartuko dugu, Gasteizko Klub Nautikora heldu arte. Aurrez aurre, urtegiaren panoramika ederra azaltzen zaizu. Bertan Landako herrigune txikia ikusi dezakegu. Harantz jo behar dugu, urtegia inguratuz.

29 km

Landako eskualde parkea zeharkatuko dugu, besteak beste mahai, eserleku eta iturriekin horniturik dagoena, belar artean galtzen den bide batetik jarraitzeko.Eskumara begiratzen badugu urtegiaren erdian dagoen Zuhatzako irla ikusiko dugu. Bertan dago Gazteriaren Foru Erakundeak kudeatzen duen aterpetxea. Belar gunea zeharkatuta bidea azaltzen da berriro ere. Urtegi ertzean kokaturik dagoen Marietararantz goaz lehenik eta pixka bat aurrerago Azuako biaduktuarekin egiten dugu topo, oraingoan eskumaldean utziko duguna. Azken zatia ur-ertzetik egingo dugu, harik eta ur gaineko pasabidera heldu arte, hasierako puntura -Garaiora- hurbilduko gaituena.